كيف تكسر سرعة كارت الشاشة و تاخد اعلي اداء في الالعاب و البرامج بدون مخاطر

كيف تكسر سرعة كارت الشاشة و تاخد اعلي اداء  في الالعاب و البرامج بدون مخاطر

إنهاردة هنعرف إيه هو كسر السرعة وإيه البرامج المطلوبة لكسر سرعة كارت الشاشة وشروط وطريقة الكسر والأضرار المحتملة ، قبل ما نبدأ إتأكد إنك تقرا المقالة كلها بعدين تنفذ اللي فيها

نبدء علي بركة الله:

1 إيه هو كسر السرعة ؟:
كل بروسيسور بيكون له عدد معين من الدورات يقدر يعملها خلال الثانية ، العدد ده معروف بإسم التردد وبيتقاس بالجيجاهيرتز GHZ ، كسر السرعة بقي هو إنك تزود الرقم ده بحيث تحصل علي آداء أعلي بدون مقابل.

2 إيه هي البرامج والحاجات المطلوبة؟:
البرامج المطلوبة حجمها مش كبير متخافش

1 MSI Afterburner.

ده هو البرنامج الأساسي اللي هنكسر بيه السرعة حجمه 40 ميجا بإذن الله

حمله من هنا

2 برنامج نقيس بيه الـ FPS.
في الشرح ده هنستخدم برنامج RivaTuner Statistics Server وده برنامج جاي مع البرنامج الأول يعني مجرد ماهتثبت البرنامج الاول هيجيلك تثبت البرنامج ده

3 لعبة تقيلة بالنسبة لجهازك للاختبار.

شوف أي لعبة عندك شغالة تقيلة شوية عشان تعرف تلاحظ فرق بعد الكسر ، شوف لعبة تكون شغالة علي 20 فريم مثلاً زي ببجي او فورت نايت ، في الشرح ده جربت لعبة Layers Of Fear علي كارت GT 610.

4 MSI Kombustor.

وده البرنامج اللي هنعمل بيه Benchmark عشان نتأكد إن الكارت مستقر بعد الكسر وده إختياري مش لازم تحمله يعني ممكن تستغني عنه في حاله انك شغلت لعبة تقيلة .
بالطبع العملية دي معقدة شوية وليها أضرار في بعض الحالات ولكن كل شئ هيتم شرحه بإذن الله.

3 التجهيز لكسر السرعة:

1هنبدأ بشرح تحميل وتسطيب البرنامج MSI Afterburner

   أدخل علي اللينك بتاعه من هنا أو من فوق

   تابع الصور

4 شروط و معلومات اساسية قبل البدء:

1- توفير تبريد كويس ومش شرط يكون تبريد إحترافي أو تبريد مائي ، لا عادي ممكن يكون هوائي بس متخليش درجة الحرارة تزيد عن 43 درجة مئوية في الاجواء الباردة وإنت مش مشغل أي لعبة اما وانت مشغل لعبة او متقل علي الجهاز فلازم درجة الحرارة متزيدش عن 75 درجة مئوية.

2- لازم يكون عندك كارت علي الأقل GT 610 أو كارت AMD 5450 فيما فوق يعني كارت شاشة من اول 512 ميجا وانت طالع.

3- لازم تكون عارف إن كسر السرعة ده نتيجته مش مضمونة ، قصدي إنه ممكن يديك فريم أو إتنين زيادة وممكن يديك لغاية 10 فريمات زيادة لكنه مش هيحول كارتك القديم لكارت تاني يعني

4- الشرح ده تم تطبيقه علي أكتر من جهاز و علي لابتوب hp probook 645 g1 

4 خطوات كسر السرعة:

شوف الصورة:

أول 3 إختيارات اللي هما Core Voltage و Power Limit و Temp. Limit إياك تلعب فيهم إلا لو عارف كويس إنت بتعمل إيه ، أنا مش مسؤول عن أي حد هيغير حاجة فيهم.

  أنا إخترت تزودها بالارقام دي بالذات لإنها بتشتغل مع أغلب كروت الشاشة لكن ممكن تقلل الأرقام عن كدة لو واجهت مشاكل

بعد ما غيرت الإعدادات (ومش لازم تختار الرقم بالضبط يعني ممكن قبله واحد أو بعده واحد مش هتفرق) متدوسش علي علامة (صح) دلوقتي! ، لو دوست من غير قصدك دوس علي الزرار اللي شبه الريستارت ده عشان ترجع الإعدادات زي ما كانت.

1اللعبة اللي قلنا عليها في الحاجات المطلوبة... إفتحها دلوقتي وشوف الفريمات كام      وإحفظها في دماغك كدة

2مش لازم تقفل اللعبة ، إرجع للبرنامج ودوس علي علامة (صح) عشان تفعّل          الكسر.

3دلوقتي إرجع للعبة وشوف الفريمات زادت كام وإنت وحظك 

4 خطوة إختيارية مستحسنة : التغيير حتي الكمال:

بعد الكسرفي البرنامج إبدء زود الـ Core Clock ، زودها مثلاً 20 زيادة ودوس صح وإرجع للعبة إلعبها شوية كدة ييجي 3 دقايق وبعدين إرجع للبرنامج تاني وزود شوية كمان ، لما تلاقي حاجة من اللي هنذكرها في الأضرار المحتملة ظهرت يبقي رجّع الكسر شوية واقف هناك

5 الأضرار المحتملة:

متقلقش من كسر سرعة كارت الشاشة إلّا في الحالات الآتية:

1 درجة حرارة الكارت أثناء اللعب وصلت 70 درجة أو أعلي 
ودي في الواقع تعتبر الحالة الوحيدة اللي ممكن كسر السرعة يضرك فيها لإنه هيسبب ضرر للكارت علي المدي المتوسط.

2كسرت السرعة زيادة عن اللي يقدر الكارت يستحمله 

وفي الحالة دي كل اللي هيحصل إن الجهاز هيتشنج خالص ومش هتعرف تحرك حاجة فيه ، ساعتها إعمل ريستارت والجهاز هيفتح ولا كإن حاجة حصلت.

3ظهرت حاجات غريبة في اللعبة 

حاجة غريبة؟ 😂 أيوة شوف الصورة دي

​الصورة من لعبة Layers Of Fear علي كارت GT 610 مكسور السرعة +100 MHZ علي Ultra

شايف الخطوط والحاجات السودة دي؟ دي بسبب كسر السرعة والحل هنا إنك تدوس علي علامة الـ Reset في البرنامج عشان تلغي كسر السرعة وترجع الحاجات لأصلها وتقدر تلعب اللعبة اللي بتظهر فيها المشكلة دي ، يعني مش بتيجي في كل الألعاب.

4اللعبة آداءها بقي قليل أو مش راضية تشتغل 

وفي الحالة دي إحذف برنامج MSI Afterburner وبرنامج RivaTuner وشيل حكاية كسر السرعة من دماغك.

6 سؤال وجواب:

1 هل كسر السرعة بالطريقة دي هيأثر علي عمر الكارت؟

= لا ، طالما مغيرتش قيمة الـ Core Voltage  يبقي خليك مطمئن.

2 هل لازم كل مرة أفتح البرنامج عشان اكسر السرعة؟

= أيوة لازم او ممكن تغير الاعدادات و تعلم علي start with windows  و ده هوضحه في الفديو.

3 لازم كل مرة أعمل الإعدادات تاني؟

= لا مش لازم ، في البرنامج هتلاقي شوية أرقام كدة 1 2 3 4 5 جنبهم زرار Save صغير ، إعمل الإعدادات ودوس علي الزرار الصغير ده وإختار رقم من الأرقام اللي جنبه و هوضحة في الفديو.

4 ممكن أخسر حاجة لو طبقت الشرح غلط أو كسرت السرعة زيادة؟

= لا ، غالباً هتطلع سليم من أي غلطة ممكن ترتكبها ، لو أي حاجة واجهتك بسبب كسر السرعة تقدر تسيبها في كومنت وهرد عليك مجرد ما أشوف الكومنت.